Halmashauri ya Wilaya ya Njombe yaanza ujenzi wa Hospitali

Tarehe iliyowekwa: February 6th, 2019

Halmashauri ya wilaya ya Njombe imeanza ujenzi wa Hospitali katika eneo la Matembwe baada ya kupata fedha kwa ajili ya ujenzi huo.

Tayari  Halmashauri imepokea kiasi cha 1,500,000 kwa ajili ya ujenzi wa majengo mbalimbali ambayo yatajengwa na  mafundi  wa kawaida kupitia  force account kwa kusimamiwa na wataalam kutoka katika Halmashauri.

Majengo yaliyopendekezwa kuanza ni pamoja na jengo la utawala,  jengo la wagonjwa wa nje (OPD), stoo ya dawa, Maabara, jengo la vipimo vya mionzi(x-ray),jengo la kufulia nguo(Laundry) na jengo la wazazi .

Hadi sasa eneo la mradi limeshasawazishwa kwa ajili ya kuanza kushimba msingi huku baadhi ya maandalizi ya  miundombinu muhimu ikiwemo kusogeza maji eneo la ujenzi ambapo wananchi wameshiriki uchimbaji wa mtaro wenye urefu wa kilometa mbili na nusu.

Kazi nyingine zilizofanyika ni pamoja na kujenga stoo ya muda na vyoo, Kutengeneza bango la mradi ,pamoja na Ufungaji wa solar katika banda la kuhifadhia malighafi zitakazotumika kwenye ujenzi yamekamilika.

Katika kufanikisha mradi huo Halmashauri imechangia kiasi cha milioni 20 kwa ajili ya kutekeleza shughuli mbalimbali ili kuweza kufanikisha ujenzi wa hospitali hiyo.

Aidha, vifaa kwa ajili ya ujenzi ikiwemo matofali, mawe, mchanga nondo pamoja na saruji zimeshafika eneo la mradi na uchimbaji wa msingi unatarajiwa kuanza muda wowote.

Kuanza kwa ujenzi wa hospitali hii utaboresha huduma za afya katika Halmashauri ya wilaya ya Njombe kutokana na Halmashauri kutokuwa na hospitali hivyo kutegemea huduma hasa za upasuaji kutoka katika  kituo cha afya Lupembe pekee.

Halmashauri ya wilaya ya Njombe  ina jumla ya vituo 27 vya kutolea huduma za afya ambapo Vituo vya Afya viko 4  vyote vikiwa ni vya serikali, zahanati ziko 23 ambapo za serikalini zipo 19 na nne ni  za mashirika ya dini.