Wanafunzi 2278 kufanya mtihani wa kumaliza darasa la saba Njombe

Tarehe iliyowekwa: September 4th, 2018

Jumla ya wanafunzi 2278 wa darasa la saba  wanatarajia kufanya mtihani wa kumaliza elimu ya msingi kutoka katika Halmashauri ya wilaya ya Njombe.

Mtihani huo ambao utafanyika kwa siku mbili  kote nchini kuanzia  Septemba 5 hadi 6  unahusisha wasichana 1246 na wavulana 1032 kutoka katika shule  53 zilizopo katika Halmashauri ya wilaya ya Njombe.

wasimamizi 165 wanatarajiwa kusimamia ufanyikaji wa mtihani huo huku kiwango cha ufaulu kikitarajiwa kuwa zaidi ya asilimia 80.

Maandalizi yote muhimu kwa ajili ya ufanyikaji wa mitihani hiyo  yamekamilika ikiwemo upelekeji wa mitihani katika vituo 11 teule vya kuhifadhia mitihani.

Aidha, Halmashauri ya Wilaya ya Njombe inapenda kutoa wito kwa wazazi, na walezi wa wanafunzi wanaotarajia kufanya mtihani kuhakikisha wanawapatia watoto wao mahitaji muhimu yatakayowawezesha kufanya mtihani katika hali ya utulivu.

Wanafunzi wote wanatakiwa kutojiusisha na mbinu zozote zile za udanganyifu wakati wa kufanya mtihani ambazo zitapelekea kufutiwa matokeo yao.

Halmashauri ya wilaya ya Njombe inajumla ya shule 53 za msingi huku shule za Serikali zikiwa 52 na binafsi moja.

Katika mtihani uliofanyika Mwaka 2017 jumla ya wanafunzi 2268 kutoka katika Halmashauri ya wilaya ya Njombe walifanya mtihani wa kumaliza elimu ya msingi ambapo wavulana walikuwa 950 na wasichana 1318