Madiwani waomba ufafanuzi kuhusu kuchelewa kwa fedha za Vijiji Njombe

Tarehe iliyowekwa: November 2nd, 2017

Baraza la madiwani la Halmashauri ya Wilaya ya  Njombe limeridhia ufafanuzi uliotolewa na Mkurugenzi wa Halmashauri hiyo Monica Kwiluhya baada ya kumwagiza kutoa ufafanuzi kuhusu utumwaji wa fedha za asilimia 12 kwenye maeneo ya vijiji ambao ulikuwa haujafanyika kwa wakati .

Hali hii ilitokea wakati wa kufungua mkutano wa baraza la madiwani ambapo  hufanyika kwa siku mbili huku siku ya kwanza ikiwa ni maalumu kwa kupokea taarifa ya utekelezaji wa shughuli mbalimbali kwenye maeneo ya Kata ambazo  uwasilishwa na diwani wa Kata husika.

Kufuatia kuchelewa kutumwa kwa asilimia hizo kwenye Kata  madiwani walitaka ufafanuzi kutoka kwa mkurugenzi wa sababu zilizopeleka jambo hilo ambapo mkurugenzi pamoja na wataalamu walitoa ufafanuzi kuwa  changamoto kubwa ni suala la mtandao

Hali hiyo ilipelekea baraza hilo kujigeuza kama kamati ambapo walimwagiza Mkurugenzi kuandaa taarifa ya kiasi kinachodaiwa kwenye kila  Kata pamoja na sababau zilizopeleka kuchelewa kutumwa kwa asilimia hizo.

Akitoa ufafanuzi siku ya pili ya  mkutano wa   baraza la madiwani , Kwiluhya alisema kuwa sababu iliyopelekea kuchelewa kulipwa kwa asilimia hizo ni matatizo ya mfumo wa kupokelea mapato kuanzia mwezi Julai hadi Octoba hali iliyopelekea Halmashauri kushindwa kurudisha asilimia hizo kwa wakati.

“Mheshimiwa mwenyekiti kutokana na tatizo la mfumo Halmashauri iliwasiliana na ofisi ya mkuu wa Mkoa wa Njombe pamoja na Katibu Mkuu Ofisi ya Rais Tawala za Mikoa na Serikali za Mitaa tukiomba kutatuliwa kwa changamoto hii ili Halmashauri kutekeleza majukumu yake” alisema Bi Kwiluhya.

“Tayari katibu mkuu  ameleta wataalam wa Teknolojia ya Habari na Mawasiliano kushughulikia  changamoto hizi wakisaidiana na wataalam wetu na kwa sasa tatizo limeanza kupungua na malipo yameandaliwa”  Aliongeza Kwiluhya.

Alifafanua kuwa kilichochelewesha kulipwa kwa asilimia  hizo ni usuluhishi wa fedha kati ya mashine za kukusanyia mapato na taarifa ya mapato yanayosomeka katika mfumo  kwenye ofisi kuu ya Halmashauri na kutaja kiasi kinachodaiwa na vijiji kuwa ni milioni 32 ikiwa ni fedha ya  Mwezi Machi hadi June 2017.

Katika kukabiliana na changamoto hiyo alisema kuwa Halmashauri kwa sasa imefanya mawasiliano na wamiliki wote wa simu za kukusanyia  mapato kutoa ripoti ya kila siku ili kurahisisha  usuluhisho wa miamala kati ya Halmashauri na wakusanyaji wakati wa uwasilishaji wa mapato jambo litakalosaidia upelekeaji wa asilimia hizo kwa wakati.

Mwaka wa fedha 2017/2018 katika Halmashauri ya Wilaya ya Njombe  asilimia 12 za mwezi Julai na Agosti zimeshalipwa huku ile ya mwezi septemba yenye kiasi cha 10,953,936 hundi imeandaliwa kwa malipo.